Noyabr ayının 10-da Biləsuvar rayonunun Əsgərabad kəndində Vətən müharibəsi şəhidi Hüseynli Fariz Dadaş oğlunun doğum günü, Zəhmətabad kəndində şəhid Mirzəyev Orxan Mehman oğlu və Çaylı kəndində şəhid Allahverdiyev Elnur Kamil oğlunun anım günləri ilə əlaqədar ailələri ziyarət olundu.
VETENNAMİNE.AZ xəbər verir ki, ziyarətdə YAP Biləsuvar rayon təşkilatının əməkdaşı, şəhid valideyinləri və ictimaiyyət nümayəndələri iştirak ediblər. Ziyarət zamanı qəhrəman şəhidlərimizin şərəfli döyüş yolundan söz açılaraq xatirələri yad edilmiş, ruhlarına dualar oxunmuş və valideyinlərinə baş sağlığı verilmişdir.
Məlumat üçün qeyd edək ki, Azərbaycan Ordusunun əsgəri olmuş şəhid Hüseynli Fariz Dadaş oğlu 10 noyabr 1990-cı ildə Biləsuvar rayonunun Əsgərabad kəndində anadan olmuşdur. 2020-ci ildə müddətli həqiqi hərbi xidmətə çağrılmışdır. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan Vətən müharibəsində iştirak etmiş və Füzuli rayonunun azad edilməsi istiqamətində gedən döyüşdə qəhrəmancasına şəhid olmuşdur. 4 oktyabr 2020-ci ildə Əsgərabad kənd qəbiristanlığında dəfn olunmuşdur. Azərbaycan Respublikası Prezidentinin müvafiq sərəncamlarına əsasən şəhid Hüseynli Fariz Dadaş oğlu ölümündən sonra “Vətən uğrunda” və “Laçının azad olunmasına görə” medalları ilə təltif edilib.
Azərbaycan Respublikası Daxili İşlər Nazirlyinin Daxili Qoşunlarının MAHHXHQ-su olmuş şəhid Mirzəyev Orxan Mehman oğlu 15 sentybar 1993-cü ildə Biləsuvar rayonunun Zəhmətabad kəndində anadan olmuşdur. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan II Qarabağ müharibəsində iştirak edib, Füzulinin və Şuşanın azadlığı uğrunda gedən döyüşlərdə şücaət göstərib və noyabrın 7-də Şuşa uğrunda gedən döyüşlərdə qəhrəmancasına şəhid olmuşdur. 10 noyabr 2020-ci ildə Bağbanlar kənd qəbiristanlığında dəfn olunmuşdur. Azərbaycan Respublikası Prezidentinin müvafiq sərəncamlarına əsasən şəhid Mirzəyev Orxan Mehman oğlu ölümündən sonra “Vətən uğrunda”, “Füzulinin azad olunmasına görə” və “Şuşanın azad olunmasına görə” medalları ilə təltif edilib.
Azərbaycan Ordusunun əsgəri olmuş şəhid Allahverdiyev Elnur Kamil oğlu 12 iyul 2001-ci ildə Biləsuvar rayonunun Çaylı kəndində anadan olmuşdur. 2019-cu ildə müddətli həqiqi hərbi xidmətə çağrılmışdır. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan Vətən müharibəsində iştirak etmiş və Şuşa şəhəri istiqamətində gedən döyüşdə qəhrəmancasına şəhid olmuşdur. 10 noyabr 2020-ci ildə Çaylı kənd qəbirstanlığında dəfn olunmuşdur. Azərbaycan Respublikası Prezidentinin müvafiq sərəncamlarına əsasən şəhid Allahverdiyev Elnur Kamil oğlu ölümündən sonra “Vətən uğrunda”, “Füzulinin azad olunmasına görə”, “Şuşanın azad olunmasına görə”, “İgidliyə görə” və “Qubadlının azad olunmasına görə” medalları ilə təltif edilib.
Allah şəhidlərimizi rəhmət eləsin!
