Müdafiə Nazirliyinin Mətbuat Xidmətindən VETENNAMİNE.AZ saytına
verilən məlumata əsasən, tədbirdə əvvəlcə xalqımızın Ümummilli Lideri
Heydər Əliyevin və Azərbaycanın suverenliyi, müstəqilliyi, ərazi bütövlüyü
uğrunda şəhid olanların əziz xatirəsi yad edilib. Hərbi Orkestrin müşayiəti
ilə Azərbaycan Respublikasının Dövlət Himni səsləndirilib.
Muxtar respublikada fəaliyyət göstərən əməkdar rəssamların, tələbə-gənclərin,
şagirdlərin, ictimaiyyət və mədəniyyət nümayəndələrinin və hərbi qulluqçuların
iştirak etdiyi tədbirdə dahi şəxsiyyət Heydər Əliyevin şərəfli ömür yolundan bəhs
edən videoçarxlar nümayiş olunub.
Əlahiddə Ümumqoşun Ordunun zabiti, polkovnik Fariz Sərxanov, Naxçıvan Muxtar
Respublikası Təhsil nazirinin müavini Heyran Əhmədova, Gənclər və İdman Nazirliyinin
şöbə müdiri İlahə Haqverdiyeva və digər çıxış edənlər bildiriblər ki, müdrik şəxsiyyət,
görkəmli dövlət xadimi Heydər Əliyev respublikamıza rəhbərliyinin bütün dövrlərində
Vətən və xalq qarşısında misilsiz xidmətlər, xilaskarlıq missiyası, zəngin dövlətçilik
nümunəsi göstərmişdir.
Qeyd olunub ki, Ümummilli Liderimiz Heydər Əliyevin rəhbərliyi, uzaqgörən siyasəti
və gərgin fəaliyyəti nəticəsində güclü müdafiə qüdrətinə və peşəkar döyüş qabiliyyətinə
malik Azərbaycan Ordusu formalaşıb. Ümummilli lider Heydər Əliyevin ordu quruculuğu
sahəsində həyata keçirdiyi tədbirlərin Müzəffər Ali Baş Komandan cənab İlham Əliyev
tərəfindən uğurla davam etdirilməsinin nəticəsidir ki, Azərbaycan Ordusu 30 illik həsrətə
44 gündə son qoyaraq işğal olunmuş əzəli və əbədi torpaqlarımızı azad etdi. Fəxrlə deyə
bilərik ki, bu gün ordu sıralarında xidmət edən gənclərimiz Ümummilli lider Heydər Əliyevin
ideyalarına həmişə sadiqdirlər, Vətən, xalq, dövlət qarşısında əsgəri borclarını şərəflə yerinə yetirirlər.
Tədbirdə Heydər Əliyev adına Hərbi Liseyin kursantları, Naxçıvan Qarnizonu tam orta məktəbinin şagirdləri və hərbi hissələrin özfəaliyyət kollektivləri Ulu Öndərə həsr olunmuş şeirləri bədii qiraət edib, musiqi nömrələri ilə ədəbi-bədii kompozisiya nümayiş etdiriblər.
Sonra “Heydər Əliyev İlinə” həsr olunmuş rəsm sərgisinə baxış olub. Qeyd edək ki, sərgidə Təlim-Tədris Mərkəzindəki rəsm dərnəyinin şagirdləri, o cümlədən Naxçıvan Qarnizonu tam orta məktəbinin və muxtar respublikanın bir sıra məktəblərinin şagirdləri, Naxçıvan Qarnizonu “Nərgiz” uşaq bağçasının məktəbəqədər sinfinin fidanları, Heydər Əliyev adına Hərbi Liseyin kursantları, hərbi qulluqçular və onların ailə üzvləri öz əsərləri ilə iştirak ediblər.
Sonda sərginin fəal iştirakçılarına diplom və təşəkkürnamələr təqdim edilib.
Asiman Xəlili
Vətən Naminə Mətbuat Xidməti
