Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Sosial siyasət və bu sahə üzrə qanunlar” mövzusunda növbəti təlimlər keçirilib.
Tədbirləri işıqlandıran VETENNAMİNE.AZ saytının müxbirinin verdiyi məlumata görə, Ağdaş, İsmayıllı və Şəki rayonlarında keçirilən təlimlərə Ulu Öndər Heydər Əliyevin, Azərbaycanın müstəqilliyi və ərazi bütövlüyü uğrunda şəhid olanların əziz xatirəsini 1 dəqiqəlik sükut ilə yad edərək başlanılıb.
27 aprel tarixindən start verilən təlimlər Bakı, Sumqayıt şəhərlərində, Tərtər, Bərdə, Ağdam, Salyan, Ağdaş, İsmayıllı və Şəki rayonlarında keçirilib.
Ölkə ərazisinin 9 şəhər və rayonunda keçirilən təlimlərdə AzQMƏVŞAİB-in sədri Mehdi Mehdiyev, təlimçi Aris Məmmədov, rayon icra hakimiyyətlərinin nümayəndələri, AzQMƏVŞAİB-in regionlar üzrə əməkdaşları, Qarabağ müharibəsi iştirakçıları, veteranları, qazilər və media nümayəndələri iştirak edib.
Təlimlər zamanı şəhid ailələri və Qarabağ müharibəsi iştirakçılarına, onların ailə üzvlərinə dövlətimizin uğurla apardığı sosial siyasət və bu sahə üzrə qəbul olunmuş qanunlar haqqında maarifləndirici məlumatlar verilib.
Eyni zamanda, tədbir iştirakçılarına onların hüquqlarının, müvafiq qanunvericilik aktlarının və hər hansı problemlərinin hüquq müstəvisində həlli üçün müraciət edə biləcəkləri müəyyən ünvanların əks olunduğu kitabçalar hədiyyə edilib.
Asiman Xəlili
Vətən Naminə Mətbuat Xidməti
