Ziyarətdə YAP Biləsuvar rayon təşkilatının sədr müavini Aqşin Qasımov, Azərbaycan Qarabağ Müharibəsi Əlilləri Veteranları və Şəhid Ailələri İB Biləsuvar rayon filialının sədri Bəhruz Əliyev, Deputatın köməkçisi Əfsun Əlizadə, Biləsuvar rayon İcra Hakimiyyətinin məsul işçisi Röyal Bağırov, şəhid valideynləri, qazilər və ictimaiyyət nümayəndələri iştirak etdilər. Ziyarət zamanı qəhrəman şəhidlərimizin şərəfli döyüş yolundan söz açılaraq xatirələri yad edilmiş, ruhlarına dualar oxunmuş və valideyinlərinə baş sağlığı verilmişdir.
Məlumat üçün qeyd edək ki, Azərbaycan Ordusunun giziri olmuş Əlizadə Şahmurad Hilal oğlu 24 yanvar 1991-ci ildə Biləsuvar şəhərində anadan olmuşdur. 1997-2008-ci illərdə Nizami Gəncəvi adına Biləsuvar şəhər 1 nömrəli tam orta məktəbində təhsil almış və 2009-2010-cu illərdə müddətli həqiqi hərbi xidmətdə olmuşdur. Xidmətini başa vurduqdan sonra peşə məktəbində təhsil almış, daha sonra isə Müdafiə Nazirliyinin Təlim Tədris Mərkəzində gizirlik kursunu bitirmişdir. 2012-ci ildən ordu sıralarında gizir hərbi rütbəsində xidmətə başlamışdır. 14 aprel 2015-ci ildə Ağdam istiqamətində xidməti vəzifəsini yerinə yetirərkən erməni silahlı bölmələrinin atəşkəs rejimini pozması nəticəsində qəhrəmancasına şəhid olmuşdur. 15 aprel 2015-ci ildə Biləsuvar şəhər qəbristanlığında dəfn olunmuşdur. Ölümündən sonra göstərdiyi qəhrəmanlığa görə Azərbaycan Respublikası Müdafiə nazirinin əmri ilə “Hərbi xidmətdə fərqləndiyinə görə” III dərəcəli medalı ilə təltif edilmişdir. Ölümündən sonra adı əbədiləşdirilərək yaşadığı küçəyə verilmişdir.
Azərbaycan Ordusunun giziri olmuş şəhid Xosizadə Müşfiq Zakir oğlu 14 aprel 1993-cü ildə Biləsuvar rayonunun Günəşli kəndində anadan olmuşdur. 1999-2008-ci illərdə Günəşli kənd ümumi orta və 2008-2010-cu illərdə Ağayrı kənd tam orta məktəblərində təhsil almışdır. 2011-2012-ci illərdə müddətli həqiqi hərbi xidmətdə olmuş və 2013-cü ilin noyabr ayından gizir rütbəsində ordu sıralarında xidmətini davam etdirmişdir. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan II Qarabağ müharibəsində iştirak etmiş, döyüşlərdə şücaət göstərmiş və sentyabr ayının 29-da Füzuli rayonu uğrunda gedən döyüşlərdə qəhrəmancasına şəhid olmuşdur. 29 sentyabr 2020-ci ildə Ağayrı kənd qəbirstanlığında dəfn olunmuşdur. Azərbaycan Respublikası Prezidentinin müvafiq sərəncamlarına əsasən şəhid Xosizadə Müşfiq Zakir oğlu ölümündən sonra “Vətən uğrunda”, “Füzulinin azad olunmasına görə” və “Döyüşlərdə fərqlənməyə görə” medalları ilə təltif edilib.
Allah şəhidlərimizə rəhmət eləsin!
