31 oktyabr 2023-cü il tarixdə Vətən müharibəsinin Biləsuvar rayonunun Əsgərabad kəndindən şəhidimiz Rüstəmli Kənan Yalçın oğlunun anım və Xırmandalı kəndindən şəhidimiz Ziyadov Cəsarət Zaur oğlunun doğum günü münasibətilə onların ailələrini ziyarət edərək, baş sağlığı diləklərimizi çatdırdıq.
VETENNAMİNE.AZ xəbər verir ki, ziyarətdə Biləsuvar rayon İcra Hakimiyyətinin şöbə müdiri Bərhuz Mirzəzadə, Deputatın köməkçisi Əfsun Əlizadə, YAP Biləsuvar rayon təşkilatının sədri Kamil Qurbanlı, QMƏVŞA İB Biləsuvar rayon filialının sədri Bəhruz Əliyev, SHXÇDX-nin Biləsuvar rayon şöbəsinin rəisi polkovnik Nağı Cəfərov, şəhid valideynləri, qazilər, ictimaiyyətin nümayəndələri iştirak etdilər.
İştirakçılar şəhidlərin yaxınları ilə görüş zamanı bildirmişlər ki, Azərbaycan xalqının qüruru, fəxri olan şəhidlərimizin xatirəsi hər zaman əziz tutulacaqdır.
Şəhid Rüstəmli Kənan Yalçın oğlu – 1999-cu il noyabrın 14-ü Biləsuvar rayonunun Əsgərabad kəndində anadan olmuşdur. Kənan Bakı Slavyan Universitetində ali təhsil almışdır.
Azərbaycan ordusunun əsgəri olan Kənan Rüstəmli 2020-ci il sentybarın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi üçün başlanan Vətən müharibəsində Murovdağ silsiləsindəki yüksəkliklərin işğaldan azad edilməsi, Suqovuşan uğrunda gedən döyüşlərdə iştirak etmiş və düşmən hücumunun qarşısını alarkən qəhrəmancasına şəhid olmuşdur. O, 31 oktyabr 2020-ci ildə doğulduğu Əsgərabad kəndində dəfn olunmuşdur. Müzəffər Ali Baş Komandan İlham Əliyev tərəfindən hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün şəhid Rüstəmli Kənan Yalçın oğlu ölümündən sonra “Vətən uğrunda”, “Cəsur döyüşçü” və “Suqovuşanın azad olunmasına görə” medalları ilə təltif olunmuşdur.
Şəhid Ziyadov Cəsarət Zaur oğlu – 31 oktyabr 2004-cü ildə Biləsuvar rayonunun Xırmandalı kəndində anadan olmuşdur. Həqiqi hərbi xidmətdə olan Cəsarət 19 sentyabr 2023-cü il tarixdə ölkəmizin ərazi bütövlüyünün bərpası məqsədilə Azərbaycan Silahlı Qüvvələri tərəfindən Qarabağda həyata keçirilən lokal antiterror əməliyyatlarında iştirak etmiş və qəhrəmancasına şəhid olmuşdur.
Cəsarət Ziyadov doğulduğu Xırmandalı kəndində dəfn olunmuşdur.
