Vetennamine.az -ın bölgə müxbiri xəbər verir ki, 23 iyun 2023-cü il Şabran rayon Mədəniyyət Mərkəzi Xaqani Poeziya Evində “26 iyun – Narkomaniyaya və Narkobiznesə qarşı Beynəlxalq Mübarizə Günü”nə həsr olunmuş “Zərərli vərdişlərə yox deyək!” mövzusunda maarifləndirici tədbir və aksiya keçirilib.
Səhiyyə Nazirliyi İctimai Səhiyyə və İslahatlar Mərkəzi tərəfindən Xaçmaz Regional Mədəniyyət İdarəsi ilə birgə əməkdaşlıqla təşkil olunan tədbirin məqsədi əhali arasında sağlam həyat tərzini təbliğ etmək olub. Tədbir iştirakçıları Səhiyyə kommunikasiyası şöbəsinin müdiri Laura Quliyevanın təqdimatı əsasında qısa metrajlı film izləyiblər. Sonra Şabran RP İdarəsinin əməkdaşı Rövşən Ələkbərov, Şabran RM Xəstəxanasının həkimi Həbib Həcəmov da çıxış edərək bu bəlanın fəsadlarından danışıblar.
Müasir dünyamızın ən mühüm problemlərindən biri olan narkomaniyadan bəşəriyyət hələ də əziyyət çəkir. Əvvəllər narkotikdən istifadə təhlükəsi bir neçə ölkə qarşısında dururdusa, artıq vətəndaşlarının narkotizasiyasının acı nəticələrini hiss etməyən ölkə tapmaq demək olar ki, mümkün deyildir. Vaxtilə bu problemə diqqət yetirilməməsi, ictimai təhlükəliliyinin lazımi dərəcədə qiymətləndirilməməsi nəticəsində narkomaniya yoluxucu xəstəlik kimi insanlar, xüsusən də gənclər arasında yayılmış, öz ərazisini genişləndirmiş, yaşadığımız dünyanı dağıtmaq səviyyəsinə qədər gəlib çıxmışdır.
Buna görə də narkomanlığa qarşı vaxtında aparılmış keyfiyyətli profilaktik tədbir çox vacibdir. Bu, profilaktika böyüməkdə olan gənc nəslə aid maarifçilik işinin ayrılmaz hissəsi olmalıdır. Yeniyetmələr arasında aparılan keyfiyyətli profilaktik iş narkotik istifadəçilərinin sayını azaltmaqla müsbət nəticələr verir, onları ailələrinə və cəmiyyətə qazandırır.
Atayeva Günay
