Vetennamine.az saytı Qarabağ uğrunda gedən döyüşlərdə şəhid olan hərbçilərimizi ictimaiyyətə tanıtmaq məqsədi ilə növbəti məqalə hazırlayıb.
Polkovnik-leytenant Əfqan Abdurahmanov 25 may 1976-cı Bakı şəhərində anadan doğulmuşdur. Təhsilini 1982-1993-cü illərdə Binəqədi rayonunda Vahid Əzizov adına 30 nömrəli tam orta mətəbdə, 1997-2001-ci illərdə Heydər Əliyev adına Azərbaycan Ali Hərbi Məktəbində, 2001-2002-ci illərdə isə Azərbaycan Silahlı Qüvvələrinin Təlim Tədris Mərkəzində başa vuraraq 2002-ci ildən Azərbaycan Silahlı Qüvvələrinin sıralarında zabit vəzifəsində xidmətə başlamışdır.
Əfqan Abdurahmanov 2016-cı il aprelin 1-dən 2-nə keçən gecə Azərbaycan və Ermənistan Silahlı Qüvvələrinin bölmələri arasında cəbhənin Tərtər istiqamətlərində başlanan döyüşlərdə iştirak edib.
2020-ci il sentyabrın 27-də səhər saat 06:00 radələrində Ermənistan Silahlı Qüvvələrinin bölmələri tərəfindən genişmiqyaslı təxribat törədilməsi və cəbhəboyu zonada yerləşən Azərbaycan Ordusunun mövqeləri və yaşayış məntəqələri iriçaplı silahlar, minaatnalar və müxtəlif çaplı artilleriya qurğularından intensiv atəşə tutulması nəticəsində ölənlər və yaralananlar olmuşdur. Azərbaycan Respublikasının Prezidenti İlham Əliyev Ermənistan Silahlı Qüvvələrinin döyüş fəaliyyətinin qarşısını almaq məqsədilə Azərbaycan Silahlı Qüvvələrinin cəbhəboyu zonada hücum əməliyyatlarının başlaması barədə qərar verilmişdir.
Polkovnik-leytenantı Əfqan Abdurahmanov 2020-ci il sentyabrın 27-də Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Suqovuşan qəsəbəsinin azadlığı uğrunda gedən döyüşlərdə iştirak edib. Əfqan Abdurahmanov döyüşlərdə tabeliyində olan şəxsi heyətə həmişə qəhrəmanlıq nümunəsi göstərərək düşmənə sarsıdıcı zərbələr endirərək böyük itkiyə məruz qoymuşdur. 10 oktyabr 2020-ci ildə Suqovşan uğrunda gedən döyüşlərdə qəhrəmanlıq göstərərək şəhid olmuşdur. Qəbələ rayonunun Əmirvan kəndində dəfn olunub.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Respublikasının Prezidenti İlham Əliyevin 09.12.2020-ci il tarixli Sərəncamına əsasən Əfqan Abdurahmanova “Vətən Müharibəsi Qəhrəmanı” adı verilmişdir.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Əfqan Abdurahmanov ölümündən sonra “Vətən uğrunda” medalı ilə təltif edildi.
Suqovuşan qəsəbəsinin işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Respublikasının Prezidenti İlham Əliyevin 29.12.2020-ci il tarixli Sərəncamına əsasən Əfqan Abdurahmanov ölümündən sonra “Suqovuşanın azad olunmasına görə” medalı ilə təltif edilib.
