VETENNAMİNE.AZ xəbər verir ki, Biləsuvar rayonunda şəhidimiz Talıblı Asif Arif oğlunun doğum günü qeyd olunub.
Bu münasibətlə RİH-nin şöbə müdiri Bəhruz Mirzəzadə, SHXÇDX-nin Biləsuvar rayon şöbəsinin rəis müavini mayor Vasif Rzayev, AzQMƏVŞAİb-in Biləsuvar rayon filialının sədri Bəhruz Əliyev və şəhid valideynləri şəhidimizin evinə baş çəkərək valideynləri ilə görüşüblər. Daha sonra şəhidin məzarını ziyarət edərək, əziz xatirəsini ehtiramla yad ediblər.
Şəhid Talıblı Asif Arif oğlu 1993-cü il Biləsuvar rayonunun Zəhmətabad kəndində anadan olmuşdur. Azərbaycan Daxili İşlər Nazirliyinin Daxili Qoşunlarının çavuşu olan Asif Talıblı Vətən Müharibəsi zamanı Murovdağın, Cəbrayılın, Xocavəndin, Füzulinin azadlığı uğrunda döyüşlərdə savaşmış və Füzuli uğrunda gedən döyüşlərdə şəhid olmuşdur.
Müzəffər Ali Baş Komandan tərəfindən ölümündən sonra “Vətən Uğrunda”, “Cəbrayılın Azad Olunmasına Görə”, “Kəlbəcərin Azad Olunmasına Görə”, “Xocavəndin Azad Olunmasına Görə” medalları ilə təltif olunmuşdur.
Ailəli idi. Ayan adlı qız övladı Dövlətimizə əmanətdir.
Allah Şəhidlərimizə Rəhmət Etsin!
Aris Məmmədov
Vətən Naminə Mətbuat Xidməti
