Baş Prokurorluqdan VETENNAMİNE.AZ-a verilən məlumata əsasən, hüquqi şəxslər barəsində cinayət-hüquqi tədbirin tətbiqi institutu sahəsində prokurorluq və gömrük orqanları arasında təcrübə mübadiləsinin aparılması məqsədilə Dövlət Gömrük Akademiyası və Baş Prokurorluğun Elm-Tədris Mərkəzi tərəfindən kompleks işlər görülür.
Tədbirlərin davamı olaraq, cari ilin 26-31 yanvar tarixlərində Dövlət Gömrük Komitəsinin müstəntiq və təhqiqatçıları Baş Prokurorluğun əməkdaşları ilə “Hüquqi şəxslər barəsində cinayət təqibinin aparılması xüsusiyyətləri” mövzusunda tədris tədbirlərində iştirak edib.
Təcrübə mübadiləsi zamanı iştirakçılar hüquqi şəxslərin cinayət təqibinin müxtəlif aspektləri, o cümlədən xarakterik sübutetmə metodları, əməllərin tövsifi qaydaları, tipologiyalar, bu institutun beynəlxalq standartlar və milli hüquq prizmasında nəzəri aspektləri, habelə digər aktual məsələləri əhatə edən tədris tədbirlərində iştirak edib.
Dövlət Gömrük Komitəsinin Əməliyyat-İstintaq Baş İdarəsinin, eləcə də Baş Prokurorluğun Elm-Tədris Mərkəzinin inzibati binalarında təşkil edilmiş tədrisə hər iki qurumun məsul və təcrübəli əməkdaşları təlimçi qismində cəlb edilib.
Tədbirin sonuncu günündə həmkarlar birlikdə Baş Prokurorluğun Zəfər muzeyi, kriminalistik laboratoriyası və digər imkanları ilə tanış olub.
Vətən Naminə Mətbuat Xidməti
