İsveçdə İslamın müqəddəs kitabı Qurani-Kərimə qarşı ikinci dəfə keçirilən tədbirdən sonra İsveçin müxtəlif ölkələrdəki səfirləri çağırılıb.
VETENNAMİNE.AZ xarici mediaya istinadən xəbər verir ki, bu qınaqlar və hərəkətlər cümə axşamı Stokholmda keçirilən nümayişdən sonra baş verib və burada etirazçılar Quran olduğunu dedikləri kitabı təpikləyib və qismən zədələyiblər.
Stokholmdakı etirazçılar əvvəlcə təhdid etdikləri kimi Quranı yandırmadılar, lakin bu hadisə müsəlmanların çoxluq təşkil etdiyi bir neçə ölkədə yenə də aksiyaya səbəb oldu.
Cümə axşamı səhər saatlarında Bağdadın mərkəzindəki İsveç səfirliyi yandırılıb.
Stokholmdakı tədbiri iyunun 28-də Quran səhifələrini yandıran, İsveçdə yaşayan 37 yaşlı xristian iraqlı qaçqın Salvan Momika planlaşdırıb.
Son hadisələrə cavab olaraq bəzi reaksiyaları təqdim edirik:
İraq
İraq cümə axşamı İsveçin bu ölkədəki səfirini ölkədən çıxarıb. İraqın baş naziri Məhəmməd Şia əl-Sudani də ölkəsinin İsveçdəki müvəqqəti işlər vəkilini geri çağırıb və İsveç telekommunikasiya şirkəti Ericsson-un İraq ərazisində işləmək icazəsini dayandırıb.
İraqın Xarici İşlər Nazirliyi də İsveç səfirliyinə hücumu pisləyib və belə bir hadisənin yenidən baş verəcəyi təqdirdə İsveçlə diplomatik əlaqələri kəsəcəyini bildirib.
Qətər
Qətər cümə günü səhər tezdən İsveç səfirini çağıraraq ona Stokholmdakı hadisələrlə bağlı etiraz notası təqdim edib.
Qətər xarici işlər nazirliyi açıqlamasında bildirib ki, İsveç rəsmiləri “bu biabırçı hərəkətləri dayandırmaq üçün bütün lazımi tədbirləri görməlidir”.
Səudiyyə Ərəbistanı
Səudiyyə Ərəbistanı İsveçin Ər-Riyaddakı müvəqqəti işlər vəkilini çağıraraq onlara etiraz notası təqdim edib.
Livanda Hizbullah
Livanın Hizbullah hərəkatının lideri Həsən Nəsrullah ərəb və müsəlman ölkələrini İraqın addımlarını izləməyə və İsveç səfirlərini ölkələrindən qovmağa çağırıb.
O, cümə namazından sonra nümayişlərin keçirilməsinə çağırıb və deyib: “Bizim Quranımızı necə qəbul etdiyimizi bütün dünya, qanımızla Quranımızı necə qoruduğumuzu bütün dünya görməlidir”.
Türkiyə
Türkiyə bunu “alçaq hücum” kimi pisləyib və İsveçi İslama qarşı “bu nifrət cinayətinin” qarşısını almaq üçün qətiyyətli tədbirlər görməyə çağırıb.
Xarici İşlər Nazirliyinin bəyanatında deyilir: “Biz müqəddəs kitabımıza yönəlmiş alçaq hücumu qətiyyətlə pisləyirik”.
İran
İranın Xarici İşlər Nazirliyi cümə axşamı İsveçin Tehrandakı səfirini “müqəddəs Qurani-Kərimin təhqir olunmasına kəskin etiraz etmək üçün” çağırıb.
Asiman Xəlili
Vətən Naminə Mətbuat Xidməti
