Vetennamine.az -ın şimal zonası üzrə bölgə müxbiri xəbər verir ki, bugün Ağsaqqallar evində 26 İyun Milli Ordunun yaranması günü ilə əlaqədar “Güclü dövlətin güclü ordusu olmalıdır” adlı dəyirmi masa keçirilib. Tədbiri giriş sözü ilə mədəni təşkilatçı Mətanət Hüseynova açaraq yaranmasının 105 illiyini qeyd etdiyimiz Azərbaycan Silahlı Qüvvələrinin yaranma tarixindən bəhs edib. Daha sonra Azərbaycanın ərazi bütövlüyü uğrunda canından keçmiş şəhidlərimizin əziz xatirəsini bir dəqiqəlik sükutla yad edilib. Tədbirdə çıxış edənlər – Nəriman Zeynalov, Təvəkkül Əliyev, Aysel Meylaverdiyeva, Günay Atayeva və leytinant Elməddin Əhmədov yüksek döyüş qabiliyyətinə, nizam – intizamına malik Azərbaycan Ordusunun şücaətindən, uğurlarından danışıblar.1993-cü ildə ümummilli lider Heydər Əliyev xalqın tələbi ilə hakimiyyətə qayıtdıqdan sonra da ordu quruculuğu istiqamətində mühüm addımlar atıldı. 1994-cü il mayın 12-də Ermənistan-Azərbaycan hərbi münaqişəsində atəşkəs haqda müqavilə imzalandıqdan sonra Azərbaycan Milli Ordusunun formalaşması daha da sürətləndi. Həyata keçirilən uğurlu siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına və döyüş ruhunun yüksəldilməsinə xüsusi diqqət ayrıldı.
Ulu öndər Heydər Əliyevin 22 may 1998-ci il tarixli fərmanına əsasən, Əlahiddə Azərbaycan Korpusunun yarandığı gün – 26 İyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir.
Tədbirin sonunda Aybəniz Əliyar, Təvəkkül Kərim və Qulu Mövsümov Azərbaycan Ordusuna, dövlətçiliyə həsr etdikləri şeirlərini söyləyiblər.
Atayeva Günay
