Tədbirdə şəhidin ailə üzvləri, yerli sakinlər, məktəblilər, müəllimlər və müxtəlif rəsmi qurumların nümayəndələri iştirak etdilər.
Elçin Nəsirov 13 yanvar 1988-ci ildə Əhmədalılar kəndində anadan olmuşdur. O, təhsilini B.Əliyev adına Əhmədalılar kənd tam orta məktəbində tamamlamış, hərbi xidmətini uğurla yerinə yetirmişdir. Şəhidimiz 2016-cı ildə “N” saylı hərbi hissədə, Murovda xidmət etmiş, 2020-ci ilin iyul ayında Türkiyədə 3 aylıq kəşfiyyat-snayper kursunda iştirak etmişdir.
Elçin Nəsirov, Vətən müharibəsinin ilk günündən etibarən ön cəbhədə iştirak edərək Füzuli və Xocavənd istiqamətindəki ağır döyüşlərdə qəhrəmancasına döyüşmüşdür. 23 oktyabr 2020-ci ildə şəhadətə ucalan qəhrəmanımız, Vətən uğrunda həyatını fəda etmişdir.
Azərbaycan Respublikasının Prezidenti İlham Əliyevin müvafiq sərəncamları ilə Elçin Nəsirov “Vətən uğrunda”, “Cəsur döyüşçü”, “Füzulinin azad olunmasına görə” və “Xocavəndin azad olunmasına görə” medalları ilə təltif olunmuşdur.
Tədbirdə çıxış edənlər şəhidimizin həyat yolundan, qəhrəmanlığından danışaraq onun əziz xatirəsinin hər zaman uca tutulacağını vurğuladılar. Tədbirin sonunda şəhidin məzarı ziyarət edildi, ruhuna dualar oxundu və anım günü iştirakçıları tərəfindən çələnglər qoyuldu.
Allah bütün şəhidlərimizə rəhmət eləsin!
