Budapeştdəki Azərbaycan Evinin təşəbbüsü ilə Macarıstanda təhsil alan və işləyən türk dövlətlərindən olan gənclər üçün Novruz şənliyi keçirilib.
Bunu Azərbaycan Respublikasının Diasporla İş Üzrə Dövlət Komitəsinin mətbuat xidmətindən vetennamine.az saytına məlumat veriblər
Bayram tədbirində Novruz bayramının tarixindən bəhs edən sənədli film nümayiş olunub, türk xalqlarının Novruz adətləri, həmçinin onların arasındakı ortaq və fərqli cəhətlər barədə danışılıb.
Əksəriyyəti ilk dəfə Azərbaycan Evinə gələn gənclər bu görüşü əməkdaşlığın, birlik ənənəsinin başlanğıcı adlandırıb, birlikdə müxtəlif xalqların milli rəqslərini ifa edib, əyləniblər.
Burada həmyerlilərini tapan, yeni əlaqələr qurmaq fürsəti qazanan gənclər Azərbaycan Evinin əslində belə görüşlər təşkil edərək daha böyük bir missiyaya – birlik missiyasına xidmət etdiyini vurğulayıblar.
Bayram tədbirində Diasporla İş üzrə Dövlət Komitəsinin əməkdaşları da iştirak edib və “Vətən uzaqda deyil” proqramının bir buraxılışı üçün çəkilişlər aparıblar.
Verilişdə Azərbaycan Evinin fəaliyyətinə də yer ayrılıb, tədbir iştirakçısı olan türkdilli gənclərlə yanaşı, Azərbaycan Evinin rəhbəri İbrahim Səfərli, buradakı həftəsonu məktəbinin azərbaycanlı və əcnəb şagirdləri, onların valideynləri də proqrama müsahibələr veriblər.
Qeyd edək ki, Diasporla İş üzrə Dövlət Komitəsinin dəstəyi ilə bu gün dünyanın müxtəlif ölkələrində 19 Azərbaycan Evi fəaliyyət göstərir və yaxın zamanlarda bu sayın artması gözlənilir.
“Vətən uzaqda deyil” proqramının Budapeştdəki Azərbaycan Evindən hazırlanan xüsusi buraxılışı martın 15-də İctimai TV-də yayımlanacaq.
