15 dekabr 2023-cü il tarixində Birinci Qarabağ müharibəsinin Biləsuvar şəhərindən şəhidimiz Ağayev Kəmaləddin Əli oğlunun və Vətən müharibəsinin Ağalıkənd kəndindən şəhidimiz, Azərbaycan Ordusunun “Komando” qüvvələrinin giziri Məmmədov Məhəmməd Bilal oğlunun doğum günləri ilə əlaqədar ailələri və məzarları ziyarət olundu.
Bunu vetennamine.az saytının Cənub regionu üzrə bölgə müxbiri Bəhruz Əliyev bildirib.
Ziyarətdə Biləsuvar rayon İcra Hakimiyyətinin şöbə müdiri Bəhruz Mirzəzadə, YAP Biləsuvar rayon təşkilatının sədr müavini Aqşin Qasımov, Deputatın köməkçisi Əfsun Əlizadə, QMƏVŞA İB Biləsuvar rayon filialının sədri Bəhruz Əliyev, SHXÇDX-nin Biləsuvar rayo şöbəsinin əməkdaşı Faxrəddin Məmmədov, “Mübarizlər” cəmiyyətinin sədr müavini Sədrəddin Əliyev, şəhid valideyinləri, qazilər, və ictimaiyyət nümayəndələri iştirak ediblər. Ziyarət zamanı qəhrəman şəhidlərimizin şərəfli döyüş yolundan söz açılaraq xatirələri yad edilmiş, ruhlarına dualar oxunmuş və valideynlərinə baş sağlığı verilmişdir.
Azərbaycan Ordusunun Komando qüvvələrinin giziri olmuş Məmmədov Məhəmməd Bilal oğlu – 15 dekabr 1995- ci ildə Biləsuvar rayonunun Ağalıkənd kəndində anadan olmuşdur. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan II Qarabağ müharibəsində Füzuli, Xocavənd və Şuşa istiqamətində gedən döyüşlərində iştirak etmişdir. 2022-ci ilin sentyabr ayının 12-dən 13-ə keçən gecə Ermənistan silahlı qüvvələrinin törətdikləri genişmiqyaslı təxribatın qarşısı alınarkən qəhrəmancasına şəhid olmuşdur. Azərbaycan Respublikası Prezidentinin müvafiq sərəncamlarına əsasən şəhidMəmmədov Məhəmməd Bilal oğlu Vətən müharibəsində göstərdiyi şücaətlərinə görə “Cəsur döyüşçü”, “Füzulinin azad olunmasına görə”, “Xocavəndin azad olunmasına görə”, “Şuşanın azad olunmasına görə” medalları ilə, ölümündən sonra isə “Azərbaycan Bayrağı” ordeni və “Vətən uğrunda”medalı ilə təltif edilib. Şəhid Məhəmməd Məmmədovun adı əbədiləşdirilərək Ağalıkənd kəndində yaşadığı küçəyəverilmişdir.
Allah şəhidlərimizə rəhmət eləsin!
