Cənub regionu üzrə bölgə müxbiri Bəhruz Əliyevin verdiyi məlumata görə, tədbir Biləsuvar rayon Heydər Əliyev Mərkəzinin təşkilatçılığı, Yeni Azərbaycan Partiyası (YAP) Biləsuvar rayon təşkilatının, Gənclərin İnkişaf və Karyera Mərkəzinin rayon nümayəndəliyinin və QMƏVŞAİB-ictimai birliyinin Biləsuvar
rayon filialının dəstəyi ilə reallaşıb. Tədbirdə şəhid ailələri, qazilər, mədəniyyət və təhsil işçiləri, eləcə də gənclər iştirak ediblər.
Tədbir Ulu Öndər Heydər Əliyevin və Vətən uğrunda canlarından keçən şəhidlərin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət himninin səsləndirilməsi ilə başladı. Daha sonra tədbirin aparıcısı, Biləsuvar rayon Heydər Əliyev Mərkəzinin əməkdaşı Zahidə Heydərzadə iştirakçıları salamladı və torpaqlarımızın işğaldan azad edilməsində qəhrəmanlıq göstərən şəhid və qazilərimizin şücaətlərindən danışdı.
İştirakçılar Zəfər Günü münasibətilə hazırlanmış videoçarxa baxaraq həmin dövrün şanlı anlarını xatırladılar. Tədbirdə, həmçinin Vətən müharibəsi şəhidi Cavid Mahmudovun atası Hilal Mahmudov və 44 günlük Vətən müharibəsində şəhid olan Rahət İsayevin atası Rafət İsayev çıxış edərək övladlarının və digər qəhrəmanlarımızın keçdikləri şərəfli döyüş yolundan bəhs etdilər.
Yeni Azərbaycan Partiyasının Biləsuvar rayon təşkilatının sədri Kamil Qurbanlı isə çıxışında Vətən müharibəsində şəhidlik zirvəsinə ucalan igidlərin qəhrəmanlıqlarını və işğaldan azad edilmiş torpaqlarımızın önəmini vurğuladı.
Tədbir Biləsuvar rayon Mədəniyyət Mərkəzinin əməkdaşları və rayon məktəblilərinin ifasında vətənpərvərlik ruhunda mahnılar və ədəbi-bədii kompozisiyalarla sona çatdı. Bu tədbir, Azərbaycanın Vətən müharibəsində əldə etdiyi qələbənin dərin izlərini əks etdirən və şəhidlərimizin əziz xatirəsini yad edən bir töhfə olaraq yadda qaldı.
