Mərasimdə Biləsuvar rayon İcra Hakimiyyətinin məsul işçiləri, Milli Məclisin deputatının köməkçisi, YAP Biləsuvar rayon təşkilatının sədri Kamil Qurbanlı, Biləsuvar rayon Ağsaqqallar Şurasının sədri Akif Kazımov, QMƏVŞA İB Biləsuvar rayon filialının sədri, II qrup Qarabağ Müharibəsi qazisi Bəhruz Əliyev, şəhid valideynləri, qazilər, ictimaiyyət nümayəndələri iştirak etdilər.
Tədbirdə qəhrəman şəhidlərimizin şərəfli döyüş yollarından söz açılmış, xatirələri yad edilmişdir. İştirakçılar bildirmişlər ki, Azərbaycan xalqının qüruru, fəxri olan şəhidlərimizin xatirəsinin daim əziz tutulacaq, dövlətimiz hər zaman şəhidlik zirvəsinə ucalan igidlərimizin ailələrinin yanında olacaqdır.
Daha sonra kənd qəbiristanlıqlarında şəhidlərin məzarı ziyarət olunub, ruhlarına dualar oxunub.
Məlumat üçün qeyd edək ki, Azərbaycan Ordusunun kapitanı olmuş Vətən Müharibəsi Qəhrəmanı, Şəhid Babayev Nihad Akif oğlu 30 avqust 1991-ci ildə Biləsuvar rayonunun Günəşli kəndində anadan olub. Azərbaycan Respublikasının ərazi bütövlüyü uğrunda 27 sentyabr 2020-ci il tarixdən başlayan Vətən Müharibəsində fəal iştirak edib, döyüşlərdə şücaət göstərib və Füzuli rayonunun Yuxarı Veysəlli kəndinə yaxın Üryandağ yüksəkliyi uğrunda gedən döyüşlərdə qəhrəmancasına şəhid olub. 02 noyabr 2020-ci il tarixində Günəşli kənd qəbiristanlığında torpağa tapşırılıb. Ölümündən sonra adı əbədiləşdirilərək Biləsuvar rayonunun Xırmandalı Kənd Uşaq İncəsənət Məktəbinə verilmişdir. Müzəffər Ali Baş Komandan tərəfindən Şəhid kapitan Babayev Nihad Akif oğlu ölümündən sonra Azərbaycan Respublikasının ən ali fərqlənmə dərəcəsi – “Vətən Müharibəsi Qəhrəmanı” adı ilə və “Vətən Uğrunda”, “Füzulinin azad olunmasına görə”, “Xocavəndin azad olunmasına görə” medalları ilə təltif edilib.
Azərbaycan Ordusunun giziri olmuş Məmmədov Natiq Sahib oğlu 30 avqust 1997-ci ildə Biləsuvar rayonunun Aşağı-Cürəli kəndində anadan olub. Azərbaycan Respublikasının ərazi bütövlüyü uğrunda 27 sentyabr 2020-ci il tarixdən başlayan Vətən Müharibəsində iştirak edib, döyüşlərdə şücaət göstərib və Xocavənd rayonunun azad olunması uğrunda gedən döyüşlərdə qəhrəmancasına şəhid olub. 30 oktyabr 2020-ci il tarixində doğulduğu Aşağı Cürəli kəndində, kənd qəbiristanlığında torpağa tapşırılmışdır. Doğulub boya-başa çatdığı Biləsuvar rayonunun Aşağı-Cürəli kəndinin küçələrindən biri Şəhid gizir Məmmədov Natiq Sahib oğlunun adını daşıyır. Müzəffər Ali Baş Komadan tərəfindən Məmmədov Natiq Sahib oğlu ölümündən sonra “Vətən Uğrunda”, “Xocavəndin azad olunmasına görə”, “Döyüşdə fərqlənməyə görə” medalları ilə təltif edilib. Allah şəhidlərimizə rəhmət eləsin.
Cənub regionu üzrə bölgə müxbiri Bəhruz Əliyev
Vətən Naminə Mətbuat Xidməti
