Oktyabrın 27-də Rusiya Federasiyası O.Y.Kutafin adına Moskva Dövlət Hüquq Universitetinin dəvətilə Baş Prokurorluğun Elm-Tədris Mərkəzinin Elmi-tədqiqat işinin təşkili şöbəsinin rəisi Ramin Camalov Moskva şəhərində keçirilmiş “İqtisadi sahədə cinayətlər: Rusiya və beynəlxalq təcrübə” mövzusunda XV Beynəlxalq dəyirmi masada iştirak edib.
Baş Prokurorluqdan VETENNAMİNE.AZ -a verilən məlumata əsasən, tədbirdə yerli dövlət, hüquq mühafizə orqanlarının, vəkillər palatasının, ali və hüquq sahəsində ixtisaslaşmış təhsil müəssisələrinin nümayəndələri iştirak edib.
Tədbirdə Moskva Dövlət Hüquq Universitetinin birinci prorektoru Yerşova İnna Vladimirovna, Moskva vəkillər palatasının prezidenti Zubkov Sergey Borisoviç, Universitetin Cinayət hüququ kafedrasının rəhbəri Zvecarovski İqor Eduardoviç və dəyirmi masaya dəvət olunmuş xarici və yerli qonaqlar çıxış edib.
Dəyirmi masa iştirakçıları öz məruzələrində istintaq sahələrində tətbiq edilən yeni üsul, metod və texnologiyalar barədə geniş məlumatlar verib, qanunvericiliyin və təcrübənin təkmilləşdirilməsi üzrə təkliflər irəli sürüb.
Ramin Camalovun dəyirmi masa zamanı “Vergi cinayətlərinə görə məsuliyyətə cəlb olunma zamanı yaranan problemlər” mövzusunda çıxışı Moskva Dövlət Hüquq Universitetinin “Cinayət hüququ: XXI əsrdə inkişafı və strategiyası” elmi praktiki jurnalında dərc olunub.
Tədbirin sonunda səslənmiş fikirlər ətrafında dəyirmi masa iştirakçıları tərəfindən müzakirələr aparılıb, tədbirin ümumi nəticələri qiymətləndirilib.
Vətən Naminə Mətbuat Xidməti
