17 yanvar 2023-cü il tarixdə rayon Heydər Əliyev Mərkəzində rayon Gənclər və İdman İdarəsi və rayon Heydər Əliyev Mərkəzinin birgə təşkilatçılığı ilə “20 Yanvar” faciəsinin ildönümünə həsr olunmuş “20 Yanvar – müasir tariximizin şəhid qanı ilə yazılmış hünər səhifəsi” başlığı altında yeniyetmələrin və gənclərin iştirakı ilə tədbir keçirilmişdir.
Tədbiri giriş sözü ilə rayon Gənclər və İdman İdarəsinin rəisi Süleyman Əliməmmədov açmış, tədbirin keçirilməsi məqsədi barədə iştirakçılara məlumat vermişdir.
Tədbir şəhidlərimizin əziz xatirəsinin bir dəqiqəlik sükutla yad edilməsi ilə başlamışdır.
Tədbirdə rayon Heydər Əliyev Mərkəzinin direktoru Təvəkgül Əliyev, Mərkəzin əməkdaşı, tələbə və gənc könüllü Hüseyn Məqami çıxış etmiş və bildirmişlər ki, xalqımız artıq 33-cü ildir ki, 1990-cı ilin Qanlı Yanvarının ildönümlərini qəhrəmanlıq tarixi kimi qeyd edir.
20 Yanvar şəhidlərinin rəşadəti həm də böyük mənəvi təsir qüvvəsinə malikdir. Bu faciə sovet imperiyasının Azərbaycan xalqına qarşı törətdiyi ağır təcavüz və cinayət olmaqla yanaşı, həm də Azərbaycanın milli azadlığı uğrunda xalqımızın qan yaddaşına qəhrəmanlıq təcəssümü kimi həkk edilib. Bu qəhrəmanlıq salnaməsi gənclərimizin milli vətənpərvərlik ruhunda formalaşmasında böyük əhəmiyyət kəsb edir. Əgər xalqımızda yüksək vətənpərvərlik hissi olmasa idi, əliyalın yurddaşlarımız 1990-cı ilin 20 yanvar gecəsi sinələrini düşmən tankları önündə polad sipərə döndərməzdilər. Həmin faciəli günlərdə ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar. Böyük itkilərlə, günahsız insanların qətli ilə nəticələnən 20 Yanvar faciəsi cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın həm də mübarizliyini, əyilməzliyini, məğrurluğunu nümayiş etdirdi. Məhz Vətən övladlarının qanı bahasına uzun illərdən bəri arzusunda olduğumuz müstəqilliyə qovuşduq və ölkəmiz suverenlik əldə etdi.
Tədbirdə rayon Mədəniyyət Mərkəzinin əməkdaşı, Şabran xalq teatrının aktyoru Nurlan Fərhadlı “Şəhid anası” şeirini səsləndirmişdir
Sonda isə 20 Yanvar faciəsinə həsr olunmuş qısametrajli film nümayiş etdirilmişdir.
Vetennamine.az
