Ulu Öndər ölkəmizə rəhbərlik etdiyi bütün dövrlərdə sağlam düşüncəli gənc nəslin yetişdirilməsini, gənclərin ölkənin sosial-iqtisadi, ictimai-siyasi və mədəni həyatında iştirakının təmin edilməsini diqqət mərkəzində saxlamışdır. Dahi rəhbərin təşəbbüsü ilə hələ Sovetlər Birliyi dövründə Azərbaycan gəncliyinin inkişafı istiqamətində ardıcıl tədbirlər həyata keçirilmiş, milli dəyərlərə və tarixi-mədəni irsə bağlı gənc nəslin formalaşdırılmasının əsası qoyulmuşdur. O dövrdə gənclərin təhsili sahəsində həyata keçirilən tədbirlər, xüsusilə milli hərbçi kadrların hazırlanması ölkəmizin gələcəyinə hesablanmış tədbirlər idi. Müstəqillik illərində də ümummilli liderimizin rəhbərliyi ilə gənclərin ölkənin sosial-iqtisadi, ictimai-siyasi həyatında fəal iştirakı təmin olunmuş, onların sosial problemlərinin həlli istiqamətində lazımi tədbirlə görülmüşdür. Dövlət təşkilatlarının gənclərlə iş sahəsindəki fəaliyyətini əlaqələndirmək üçün 1994-cü ildə Gənclər və İdman Nazirliyi yaradılmış, bu sahədə dövlət siyasətinin həyata keçirilməsi məqsədilə zəruri qanunvericilik bazası formalaşdırılmışdır.
Bu gün ölkəmizdə gənclər siyasəti keyfiyyətcə yeni mərhələyə qədəm qoymuşdur. Ölkə Prezidenti cənab İlham Əliyevin qayğısı ilə gənclərimiz cəmiyyətimizin inkişafında fəal sosial təbəqəyə çevrilmişdir. Bu sahədə görülən işlərin, həyata keçirilən tədbirlərin nəticəsidir ki, Azərbaycan gəncləri öz intellektual səviyyələri, bilik və bacarıqları ilə ölkəmizin inkişafında yaxından iştirak edirlər.
Ölkəmiz inkişaf etdikcə gənclərimiz üçün yaradılan şərait də, onların fəaliyyət imkanları da genişlənir. Bu da Azərbaycanın uğurlu gələcəyini təmin edən əsas amildir.
Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin idarə heyəti və VETENNAMİNE.AZ media qrupu Azərbaycan Gənclərini təbrik edir, onlara vətənimizin inkişafı naminə fəaliyyətlərində uğurlar arzu edir. Bizim gələcəyimiz Gənclərlədir! Məhz bizim gənclər 44 günlük savaşda qəhrəmanlıq göstərərək Azərbaycan xalqına Qələbə sevincini yaşatdı.
Gənclər Gününüz Mübarək!
Vətən Naminə Mətbuat Xidməti
